Tilveran í framtíðini  

Nú tað gerast alt fleiri gomul, er skiftið frá arbeiðslívi til pensionistatilveru nakað, sum viðkemur okkum meira og meira. Hvat kundu vit hugsað okkum at takast við, tá vit ikki longur skulu til arbeiðis? Vilja vit heldur dansa Rock and Roll enn at mála postalín? Kundu vit hugsað okkum at átaka okkum uppgávur í barnagarðinum ella skúlanum, tá vit ikki hava møguleika at vera saman við barnabørnunum, tí tey búgva aðrastaðni?  

Kanska hetta verður eitt av evnunum sum verður tikið upp á kjakfundinum, sum verður á evnisdøgunum “virkin sum longst” í skúlanum á Giljanesi í komandi viku.  

Vit tosa um framtíðarynski. Tí eru fólk, sum um eini 5 til 10 ár gevast á arbeiðsmarknaðinum, serliga vælkomin á fundin, at geva sítt ískoyti til kjakið um hvørji krøv skulu setast til broyttu tilveruna. Hvat vænta vit og hvat kunnu vit gera? Hvussu kunnu vit vera virkin sum longst?  

Panelið, sum fer at seta gongd á kjakið, er mannað við fólki, sum dagliga virka fyri at fáa fleiri aktivitetir í kommunini. Hesi eru Brynjálvur Borðoy frá Sunda kommunu, Jastrid Hansen frá Sørvágs kommunu, Jógvan Hans Joensen frá Vága kommunu og Mortan Holm frá Porkeris kommunu. Til at halda skil á kjakinum er Halgir W. Poulsen, sakførari.

 

 

 

 

 

 

Mortan Holm, saman við Innu Nattestad, Ninnu Olsen, Odd Eide
og nógv aftrat hava fyrireikað evnisdagarnar ”virkin sum longst”  

Kommunupolitikarar fara eisini at luttaka á fundinum fyri at fáa innlit í hvat teir kunnu vænta sær av ynskjum um framtíðartilveruna hjá borgarum, sum eru farin av arbeiðsmarknaðnum.  

Tiltakið “virkin sum longst” er liður í verkætlanini OLE2, OkkaraLív sum Eldri – implementering, har Føroya Kommunufelg saman við Porkeris, Sunda, Sørvágs og Vága kommunum luttaka. Útlenskir samstarvspartnarar eru frá Svøríki og Finlandi, sum eisini hava líknandi tiltøk í somu viku.  

Verkætlanin virkar undir Útnorðurskránni og er stuðlað av m.a. Landsstýrinum og Evropasambandinum.